Dos-yaranıń bolmasa Ómirde ne lázzet bar, dos-yaranıń bolmasa | Jerdegi Juldızlar 🎭

Dos-yaranıń bolmasa

Ómirde ne lázzet bar, dos-yaranıń bolmasa,
Jan degen menen janbas, óz jananıń bolmasa.
Jılǵalar jıljıp túser bálent tawdıń basınan,
Olsız máwjirip aqpas dáryalarıń bolmasa.

Bir dushpan kóplik eter, doslarıń mıń bolsa az,
Suńqar qusqa jarasar jalǵız áylemek párwaz.
Ǵáripke Sánem bolmas biyopalı sárbinaz,
Qasıńda qádir biler miyirbanıń bolmasa.

Búlbil qus qalǵıp ketse, gúlin kórer túsinde,
Jat jurtta júrgen adam elin kórer túsinde.
Qulan-kiyik sekirip oynar óz shóliniń ishinde,
Bazergende* bazar bolmas, qarıydarıń bolmasa.

Qatnasar qarındassız el-jayıńda ne sán bar,
Barıs-kelis qılmasań, aǵayında ne sán bar.
Dosları ilham bermese, Ibrayimda ne sán bar,
Eli-xalqıń, dos-yaranıń – qádirdanıń bolmasa.

*Bázergen - sawdager

Telegram

Instagram

You tube