Ананың зары ... Ғышыр~ғышыр шыйқылдайды еденим , Ағашындай | QARAQALPAQ ÁDEBIYATÍ
Ананың зары ...
Ғышыр~ғышыр шыйқылдайды еденим ,
Ағашындай толқын жойтқан кемениң ,
Эҳ балам~әә..сен "келемен"~деп едиң ,
Қайтпайсаңба ?.. ырзаласып қалайын .
Ызғарланар көз жас тамған көрпешем ,
Өз етимсең ,сен өзимди өртесең ,
Әлле қашан күл кеўилим түртесең ,
Қайтпайсаңба ?...дийдарыңа тояйын .
Қатарым жүр ақлықларын ойнатып ,
Аналарын ақ жаўлықта тойлатып ,
"Үй"де болмай ,қойдың мени ойлатып ,
Қайтпайсаңба бир рет көрип қалайын .
Жолға қарап сарғыш жүзим сабанман ,
"Сары шашқа "өр кеўилим табанман ,
Артықпа ол мендей ғәрип анаңнан,
Қайтпайсаңба?..бир нәзерим салайын .
Ақ сүтимди берип едим кем қылмай ,
Қоймап едим қурбың менен тең қылмай ,
Әке болдым гези келсе жем қылмай ,
Қайтпайсаңба ?..бир тиллесип қалайын .
Тикленип бир қаралмайман ел журтқа ,
Хабарың жоқ ,кеткендейсең жаў "жут"қа ,
Бес күнлигим барма мениң я..жоқпа ?!
Қайтпайсаңба ?..жүзиң көрип қалайын .
Жатырман тек ,муздай жерди баўырлай ,
Хабар алар , коңсы,туўыс ғаўырлай ,
Мен ырзаман....аман жүр сен аўырмай ,
Қайтпасаңда ырзаласып қалайын .
( Бир ўақыядан )
Зульфия
Жийемуратова .