"ЖЕҢГЕМ СОРАП БАРАЖАҚ" (хәзил) "Сүйген қызың бар ма?" деп. "Ол ҳәм аҳыў-зар ма?" деп. "Қәйним ярсыз қалма" деп. Жеңгем сорап баражақ. "Батпан самал ести ме. Жигит болдың", дести де. Әтир сеўип үстине. Жеңгем сорап баражақ. Дәстүрханға шай тасып. Бир отырмас жайғасып. Апам менен ойласып. Жеңгем сорап баражақ. Шынын айтсам мен саған. Сени сырттан сынаған. Ҳәмме жериң унаған. Жеңгем сорап баражақ. Сен туўралы көп сөйлеп. Әпер деп жүр бир көйлек. "Үйин көрсет" деп сүйреп. Жеңгем сорап баражақ. Тез жеткенше асығып. Сыр сақламас жасырып. Мақтаўымды асырып. Жеңгем сорап баражақ. Айтсам, гәптиң ырасы. Таяр бол сен, қулласы. Қалтасында сырғасы. Жеңгем сорап баражақ. "Ким жеңгеңнен пәтли" деп. Үйлендириў шәрти деп. "Сәршемби күн - сәтли", деп. Жеңгем сорап баражақ. Апаңа сыр шаша бер. Ашыўланса баса бер. Дәрўазаңды аша бер. Жеңгем сорап баражақ. Байжан УЗАҚОВ 22.12.2010-жыл 907 views18:24
