Azatlyk

2022-07-01 14:29:03 Balkanda aşa yssy howa şertlerinde içgeçme köpelýär

Azatlygyň Balkandaky habarçysynyň maglumatyna görä, welaýatyň dürli sebitlerinde hem uly adamlaryň, hem-de çagalaryň arasynda güýçli içgeçme ýaýraýar.

“Howanyň gyzmagy bilen, welaýatyň Akdaş, Gyýanly ýaly ençeme sebitinde adamlarda wirusdan bolýan diareýa ýaýraýar. Muňa ýoluganlarda güýçli ysmazlyk, bedeniň gyzgynynyň ýokarlanmagy, aşgazandaky agry, täret bilen gan iriňiň gelmegi ýaly alamatlar bolýar” diýip, howpzulyk aladalary sebäpli atlandyrylmasyzlygyny soran ýerli maşgala lukmanlaryň biri habarçymyza gürrüň berdi. Aç / Yorum Yap

2022-07-01 14:28:28 Yssy howa gowaça ekinlerine zarba urýar

Azatlyk Radiosynyň habarçysy Mary welaýatynyň Türkmengala, Baýramaly we Garagum etraplarynda gyzgyn howanyň gowaça meýdanlaryna ýaramaz täsir edýändigini habar berýär. Bu aralykda, kärende ýerleri ozal ellerinden alnyp telekeçilere berlen daýhanlar daýhan hojalyklaryň eýelerini iş başarmazlykda aýyplaýar. Ekerançylyk ýerlerini kärendesine alan telekeçiler bolsa, daýhanlaryň zeýrenişleriniň we resmileriň gysyşlarynyň arasynda ekin meýdanlaryna ideg etmäge çalyşýarlar. Aç / Yorum Yap

2022-06-30 17:10:54 Türkmenistanyň Stambuldaky konsullygynda pasportlary täzelejek bolýanlaryň uly nobatlary saklanýar

Türkmenistanyň Stambuldaky konsullygynyň öňünde ullakan nobatlar saklanýar. Türkmenistanyň raýatlary binanyň öňünde köpçülikleýin ýygnanyp, möhleti geçen pasport problemasyny çözmek üçin birnäçe günläp nobata durmaly bolýarlar.

Türkmenistan Türkiýedäki raýatlarynyň möhleti geçen pasportlaryny uzaldýar. Şu sebäpden her gün ýüzlerçe adam irden konsullygyň binasyna ýygnanýarlar we edaranyň kabul ediş wagty gutarýança nobatyna garaşýar.

Azatlyk Radiosynyň Stambuldaky habarçysynyň sözlerine görä, häzir pasportlaryň möhleti soňky ýyllarda möhleti geçen biometrik pasportlaryna eýe bolan raýatlar üçin uzaldylýar. Habarçysy Mansur Magomedowyň habaryna görä, raýatlaryň ellerindäki pasportlarynyň geçen möhleti 2024-nji ýyla çenli uzaldylýar. Paportynyň möhletini uzaldyp bilenleriň arasynda dokumentleri 2020-nji, 2022-nji we 2019-njy ýyllarda gutaran adamlar bar. Aç / Yorum Yap

2022-06-29 15:55:50 Jokrama yssyda Gurbanguly Berdimuhamedowyň doglan güni mejbury belledilýär

Türkmenistanyň öňki awtoritar prezidenti Gurbanguly Berdimuhamedowyň 29-njy iýundaky doglan gününe gabat, ýurduň dürli künjeklerinde mejbury aýdym-saz we medeni çäreleri geçirilýär. Mundan başga-da häkimiýetler, ýurduň agyr ykdysady çökgünlik bilen ýüzbe-ýüz bolup duran mahaly, ozalky ýyllaryň tejribelerine eýerip, daşary ýurtly bagşy-sazandalaryň konsertlerini hem gurnaýar.

Lebap welaýatynyň dolandyryş merkezi Türkmenabatda, 15 ýyllyk häkimiýeti döwründe adam hukuklaryny berk depelemekde tankytlanan, Gurbanguly Berdimuhamedowyň 65 ýaşynyň dolmagy mynasybetli, kanun goraýjy gulluklaryň işgärlerine, şol sanda ýol polisiýasyna baýramçylyk lybaslarynda, ýagny ak köýnekde işlemek buýruldy.

Mundan başga-da, türkmenabatly býujetçilere iş sagatlaryndan soň, şäheriň seýilgählerinde gurnaljak aýdym-saz konsertlerine hökmany gatnaşmalydygy tabşyryldy. Aç / Yorum Yap

2022-06-29 15:55:08 Türkmenistanlylar ýurda dolanmak üçin $3000-e çenli 'para bermeli bolýar'

"Türkmenistan" awiakompaniýasy halkara uçar gatnawlarynyň dikeldilip başlanýandygyny yglan edensoň, şu aýyň başynda Türkmenistan Dubaý we Kazan ugurlary boýunça dowamly uçarlary ýola goýdy. Ýöne türkmen raýatlarynyň ençemesi bu uçar gatnawlary boýunça Türkmenistana dolanmak üçin bir müňden üç müň amerikan dollaryna çenli para bermeli bolýandyklaryny aýdýar.

Bu barada Azatlyk Radiosyna gürrüň beren türkmenistanlylar para bermedik raýatlaryň uçar biletlerini satyn alyp bilmeýändigini, şeýlelikde, watana dolanmak umytlarynyň puja çykýandygyny aýdýarlar. Aç / Yorum Yap

2022-06-28 14:20:58 Rus baş diplomaty Aşgabatda

Russiýanyň daşary işler ministri Sergeý Lawrow birinji gün Türkmenistana geldi diýip, TASS 27-nji iýunda habar berdi.

Ol Aşgabat şäherinde 29-njy iýunda geçiriljek Hazar sammitiniň öňüsyrasynda, Hazarýaka döwletleriniň ýokary derejeli diplomatlarynyň 28-nji iýunda geçiriljek ýygnagyna gatnaşar.

28-nji iýunda daşary işler ministrleri derejesinde geçirilýän duşuşyga S. Lawrow bilen bilelikde Azerbaýjanyň, Eýranyň, Gazagystanyň we Türkmenistanyň daşary işler ministrleri gatnaşýar.

Bu sapar Russiýanyň Ukraina garşy başladan esassyz urşunyň arasynda geçirilýär. Aç / Yorum Yap

2022-06-28 14:19:25 Türkmenistana dolanýan raýatlarda maýmyn mamany anyklamak boýunça berk barlaglar geçirilýär

Şu günler daşary ýurtlardan Türkmenistana gelýän ýolagçylar koronawirus testinden başga-da, maýmyn mama keseli barlagyndan geçirilýär. Lebap welaýatynyň dolandyryş merkezi Türkmenabat şäheriniň aeroportunyň işgärleri ýolagçylarda bu keseliň bardygyny ýa ýokdugyny anyklamak üçin olaryň bedenini tutuşlygyna, jikme-jik barlaýarlar.

"Daşary ýurtlardan Türkmenabadyň aeroportuna gonan uçardaky ýolagçylar ilki migrasiýadan, soňra-da gümrük proseduralaryndan geçýärler. Ýolagçylardan COVID testi alynýar. Olar test üçin 120 manat töleýärler. Olaryň ýanynda aýlyk bank kartlary ýokdugy sebäpli, tölegler diňe nagt kabul edilýär. Mundan soňra ýolagçy bir otaga salynýar we şol ýerde onda maýmyn mama keseliniň bardygyny ýa ýokdugyny anyklamak üçin onuň bedeni jikme-jik barlanýar. Olardan hiç hili test alynmaýar" diýip, aeroportdaky çeşmämiz gürrüň berdi. Aç / Yorum Yap

2022-06-28 13:05:27 Aşa yssy howa: Mallar köpçülikleýin gyrylýar, oba-hojalyk tehnikasy sandan çykýar

Türkmenistanda howanyň gyzgynynyň ýene-de adatdan daşary derejelere ýetmegi sebäpli, Mary welaýatynda iri we ownuk şahly mallar köpçülikleýin haram ölýärler, şeýle-de bal arylary gyrylýarlar. Ýerli weterinarlar bu ‘pajygaly’ ýagdaýlara çykalga tapyp bilmeýändiklerini aýdýarlar. Galyberse-de, aşa yssy howa adamlaryň, jandarlaryň saglygyna ýaramaz täsir etmek bilen birlikde, meýdandaky oba-hojalyk tehnikalaryny hem sandan çykarýar.

Tomsuň gelmegi bilen soňky günler Türkmenistanyň tas ähli künjeklerinde diýen ýaly howanyň temperaturasy kölegede 50 gradusa çenli golaýlaýar. Aç / Yorum Yap

2022-06-28 13:04:55 Awazada dynç alyş möwsümi başlady, bahalar 130%-e çenli ýokarlandy

Balkan welaýatynyň Türkmenbaşy şäheriniň çäginde, Hazar deňziniň kenarynda ýerleşýän "Awaza" syýahatçylyk zolagynda dynç alyş möwsüminiň başlamagy bilen, sebitde azyk harytlarynyň, transport hyzmatlarynyň, alkogol içgileriniň we temmäki önümleriniň bahasy 60%-den 130%-e çenli gymmatlady.

Azatlyk Radiosynyň bu barada sebitden maglumat berýän habarçysy soňky birnäçe günüň dowamynda şäheriň bazarlarynda bir kilogram etiň bahasynyň 60 manatdan 100-120 manada ýokarlanandygyny aýdýar.

Mundan bir aý ozal 10 manatdan bahalanan tamdyr çöregi 20 manada gymmatlady. Üzümiň, kartoşkanyň we towuk etiniň bahasy hem tas iki esse ýokarlandy. Häzirki wagtda bir kilogram üzüm 50 manat, kartoşka 20 manat we towuk eti 60-80 manat aralygynda bahalanýar. Aç / Yorum Yap

2022-06-27 15:29:06 Dört türkmenistanly Russiýada dükan urup tutuldy

Russiýanyň Leningrad sebitinde Türkmenistanyň dört raýaty dükan talamakda güman edilip tussag edildi diýip, “Turkmen.news” neşiri “47News” neşirine salgylanyp habar berdi.

Derňew netijesine görä, migrantlar 25-nji iýun güni, ir sagat bäşde, “Renault Logan” ulagynda baryp, Wolhow etrabynyň Kuti obasyndaky “Magnit” dükanynyň ýeňse ýüzündäki otagyň gapysynyň gulpuny döwdüler. Olar ýeňseki otagdan, “LenTV-24” neşiriniň maglumatyna görä, 119,000 rubl (2200 dollar) tapdylar.

Bu pullary alan migrantlar gaçyp, gizlenmäge synanyşdylar. Ýöne olar ýarym sagatdan soň goňşulykdaky Wsewoložsk etrabyndaky uly ýolda tussag edildi.

Derňewçiler häzirki wagtda bu toparyň ozal hem jenaýat edip-etmändigini barlaýarlar. Tutulanlar deslapky tussaghanada saklanylýar. Aç / Yorum Yap