2021-10-10 21:36:16
Мен тиримен!!!
(Арал теңизи тилинен)
автор Т.Қарлыбаев
24.11.2020 жыл.
Мен тиримен - еле ерте көмиўге,
Мен тиримен - асықпайман өлиўге,
Адамзаттың қәтеси бир теңизди,
Себеп болды жүзлеп көлге бөлиўге.
Мен тиримен - байласаң да сағамды,
Мен тиримен - буўсаңлар да жағамды,
Қашанлардур толқынларды ойнаттым,
Ҳәўеслетип Каспий деген ағамды.
Мен тиримен - дуньяға көп мийнетим,
Мен тиримен - бийкар кетти зийнетим,
Фашистлерге қарсы турған әскерге,
Азық бердим, нурлы еди нийетим.
Мен тиримен - еле жоқдур қәбирим,
Мен тиримен - инсан берди жәбирин,
Пахта егип, суўсыз мени қалдырып,
Сынасаң да еле күшли сабырым.
Мен тиримен - шығармаңлар өлдиге,
Қәдирлеңлер қумлық басқан шөлди де,
Умыттың ба?, бекиремниң мазасын,
Сол балықтан қалдырмадың төлди де.
Мен тиримен - итибарсыз қалсам да,
Байқамайсаң ҳалсиз болып талсам да,
Ғәзеп пенен ашшы дузды тараттым,
Нәзериң жоқ ашыўымды алсам да.
Мен тиримен - үмитим бар өмирден,
Жанатуғын, оттан қалған көмирмен,
Әзирейилге аңсат берер жаным жоқ,
Дизиминде ең биринши нөмирмен.
Мен тиримен - ажыратсаң да журтымнан,
Пайдаландың балық алып уртымнан,
Мине ҳәзир шала жанлы болсам да,
Байыдыңлар, ҳәтте майда қуртымнан.
1.5K views18:36