2022-01-22 22:22:52
"БЕРДАҒЫ ЖОҚ ЗАМАН-Ә!..."
Бул күнлери шөп те қосық, шөбир де,
Жағымпаздың айдарын жел қағама?!
Жазылады келген затлар кеўилге,
Ессиз ғана, Бердағы жоқ заман-ә!..
Шайырларға толды патша сарайы,
Сарай емес "мақтаў сөзлер орайы",
"- Кемшилик пе?!...
- Яқ, жазбаңыз, ол айып!"
Деп өзлери сыбыр-сыбыр қылама?!
Оқып көрсең... "Жасап жүрмиз, хошлықта,
Кемимиз жоқ, толып турар бослық та..."
Өмир сүргиң келеди сол қосықта,
Әттең бирақ сәйкес келмес шамама...
Неге керек, көрип турған өтирик?!
"Жоқ" затларды "Бар" дей бериў "көпирип",
Көрген пайда, зал төринде отырып,
Бар болғаны "Фахрий ёрлиқ" ала ма?!.
Жазсамбекен "солар" менен ойласып?
Сыйлықланып, оны бирге тойласып...
(Қой, өзимниң лирикамнан қоймасын!
Жағымпазлық сыя қоймас санама...)
Ҳәзир көби ҳақыйқаттан атлаған,
Қосықларын мақтаўларға таплаған,
Ҳеш қайсысы елдиң жайын айтпаған,
Ессиз ғана, Бердағы жоқ заман-ә!..
Тапсаң тап ал, сөзлеримниң қәтесин,
Табылмаса намыс пенен дәртлесиң.
(Гәп келгенде аямаған әкесин,
Ал ким жаман?...
Сирә Өжет жаман а?!)
Өжет Байназаров.
22.01.2022.
380 views19:22