QARAQALPAQ ÁDEBIYATÍ

2022-01-15 23:36:11 Тек өзим билемен гүнәларымды

Гейде өзим қозғап намыс арымды,
Билмей де қаламан жоқ я барымды
Жаратқаннан бөлек мына дуняда,
Тек өзим билемен гүналарымды.

Жалғызлықта кеуил сандығын ашып,
Қатемди ақтарып жан-жаққа шашып,
Дүзетиуге көп хәрекет ислеймен,
Сирә кеталмайсаң олардан қашып.

Гей биреулер болды өнерге қумар,
Қылған ислеримнен кеуили толар,
О қандай ажайып инсансыз десе,
Үстимнен муздай суý қуйғандай болар.

Базда ойланаман ийманым кембе,
Сауаптан гүнаға барыуым демде,
Масияттан* қанша қашқаным менен,
Мен тилекке қарсы бендемен бенде.

Рохмандур Алла бир атың сениң,
Мәрхаматың шексиз кәмил исеним,
Еле шықпағанша ең соңғы демим,
Аллах мийримиңнен дәмем көп мениң

*Масият - гүна

28.12.2021
Бабаниязов Қыдырнияз

Каналға ағза болың
https://t.me/qidirniyazbabaniyazov96 Aç / Yorum Yap

2022-01-15 18:01:35 Aç / Yorum Yap

2022-01-15 18:01:30 Өзлеринше илимли, тилиме өзгерис киритиўге урынып атырған алымсымақларға.

автор Т.Қарлыбаев
15.01.2022 жыл


Жанға тийип, қабағымды үйдирип,
Ғәзепленип, қолыма муш түйдирип,
Алымсымақ, өзлеринше билимли,
Илимпазлар ҳәммени тур күйдирип.

Ҳәрибимди өзгерттиңиз басында,
Кимлер турды сол ўақлары қасыңда?
Мәмлекеттиң сонша пулын сарыплап,
Писти қуртыў неге керек расында?.

Латын ҳәрип кирилиңнен сазбеди?
Оннан басқа машақатың азбеди?
Бурынғының мийнетлерин пуш қылып,
Қайсы алым «латын менен жаз» деди.

Яқшы дедик, қабылладық латынды,
Енди және нелер сизге батынды,
"Y" ди қойып "Е" ҳәриптиң алдына,
"W" деп жаздық Өзбекстан атыңды.

Үтир, ноқат қойып ҳәрип шетине,
Өзгерислер киргизип ҳәр бетине,
Әлипбени бунша тезден жаңартып,
Саўатсыз қып нийетиңе жеттиң бе?

"Әлип" ҳәм "Бе" араблардан алынған,
Ҳәриплери бейимлесип салынған,
Жеңиллетип кирилге биз өткенде,
Бир қабыллап өзгериссиз қалынған.

"Методикалық" деген сөзди таңлайман,
"Усиликалық" ты енди қалай аңлайман,
"Математика"ны "Есаптика" десе де,
Мен еситсем енди ҳайран қалмайман.

Эй алымлар сәл қайтыңлар изиңе,
Бул таяқтың ушы тийер өзиңе,
Оқыйман деп енди келген баланың,
Қалайынша тик қарайсыз көзине.

Сизге де бир устаз берди билимди,
Мейли излен, раўажландыр илимди,
Бирақ, лекин өтинемен, илтимас!!!!
Ўайраңламаң мениң ана тилимди! Aç / Yorum Yap

2022-01-15 13:10:41 ДЕБДИҮ

Шадлы демлеримиз ғамға уласты
Кеүил көшесинде жылулық қашты
Набада жаман болсын набада жақсы
Дүйым - жүрт гәпине жарасар болдық

Бийкар шықтыма гөзлеген дәмем
Ишқы пасылының қүны пәслеген
Көксимизге мың бәхар өткенге шекем
Әрман қүсларын қамасар болдық

Саған басу айтып қолын созар жоқ
Кемтик кеүилиме зәррем толар жоқ
Мүхаббеттен күйгенлерге обал жоқ
Тарам тәшүишлерге қаласар болдық

Шәштен қайтпадық сеники жөн деп
Әбден жылыстығау гүманлы тәреп
Әзийзим ғурурлық жеңис мүбәрек !
Айралық күнлерин санасар болдық

Жүзде балқынар қайғымыз сынық
Кеште қиялларға күлкимиз сызып
Кешир қайта - қайта жатақтан турып
Таңға үйқымызды жамасар болдық

Еле көп айтысады бизди халайық
Сол пурсат үзилер жүреклер тайып
Иштен сағынамыз...жек көрип айтып
Досларды солай алдасар болдық

Жетер ..! шадланүға өзиңди шәртле
Уақыт жанымызға сүртеди дәлде
Сондада ядқа салып жиберсе хәр не
Тасада бир жылап алысар болдық

Азамат Аматов Aç / Yorum Yap

2022-01-15 10:47:42 Бәхерди сағынғанман.

Айқулақтай тауланып таңғы нурда.
Мөлдиреп шық түсипди ерте таңда.
Жуусанның ийиси бар анау қырда
Сәуирдиң жели есер жағып жанға,

Өпепектиң өзгеше нотасы бар,
Билсеңиз оннан артық нама бар ма!?
Мениң ушын пасыллар атасы бар,
Бәхерге теңлескендей шама бар ма?!

Қақ жарып сол қыстағы музлы тоңды,
Ана жер жибий берер жазылысып.
Жадыраған кеуиллер күтер таңды,
Үргинде қалып кеткен қысылысып.

Жүрекке йош бергендей бәхер келер,
Қарлығаш ушып келер дәлийзиме.
Кийиктей бир сулыу қыз ғаз-ғаз жүрер,
Күлимлеп айланады әзийзиме.

Көк майсалар төбесин көрсетеди,
Бийдайлар желкилдесип атызларда.
Бағлар да ақ липасын силтеседи,
Жымыңласып күлимлер жулдызлар да.

Кеуилимде "жылт",еткен сағым өшип,
Көксиме қапашылық тағынғанман.
Биротала келдим мен бунда көшип,
Мен соныңдай бәхерди сағынғанман.

2022-жыл.15-январь.

Абат Крамов. Aç / Yorum Yap

2022-01-14 13:07:24 ЖАСАСЫН ЕРЛЕР!

Нәзер салсам әзел шайыр хатына
Мақтап жыр арнаған ҳаял затына
Билмедим негедур азлаў қосық бар
Бул өмирде еркеклердиң атына

Гүрриң етсем тарийхтың ҳоо басынан...
Тапқанларым тәўир ҳикмет тасыған
Ҳаял заты жаратылған емес пе?!...
Ҳаслында еркектиң қабырғасынан

Китаптағы дәстан, аңыз, ертекте
Қай жуўмағын, қай шешимин көрсек те
Бәрибир соңында ақыр-ақыбет
Мүтәжлик сезеди ҳаял еркекке

Көз алдыңа келтир, ерлерсиз әлем
Әтирапта гиллең доланған сәнем
Қанша жарыспаққа шырайлансаң да
Ерсиз неге керек пардоздай бәлең?!

Ҳаялға жалғызлық бермеген пайда
Еркек жоқта, саған ким болар шайда?!
Түўел тураберер күндеги саның
Еркексиз ҳаялға көбеймек қайда?!

Сақламаққа қорғанының тынышын
Ар-намыс деп жаўға шабар қылышын
Билсең сол ерлердиң мийнет жемиси
Қазаныңда қайнап турған ырысың

Шийрин сөзиң берсе дәртке дәрмана
Атирапыңда ер болады пәрмана
Ҳаслы жумсақ минез олардың бәри
"Қызбалығы бар" демесең, сәлғана

Ҳаялдың өмирин безеўши зергер
Өткир зейни менен узақты серлер
Заманымның мәрт-баҳадыр адамы
Ҳүрметке бөленип жасасын ерлер!

Жангелдиев Ниетулла (ойшыл)

12.01.2022ж
@oyshil_qosiqlari Aç / Yorum Yap

2022-01-14 13:07:21 @qaraqalpaqadebiyati Aç / Yorum Yap

2022-01-14 12:15:22 ҲУҚЫҚЫМНЫҢ ҚОРҒАЎШЫСЫ

Толып-тасып жаздым қәлем,
Ел - парахат, тыныш - әлем,
Туўры жолға баслар қәдем,
Ҳуқықымның қорғаўшысы.

Ўатан ушын желип-шаптың,
Ҳадаллықтан ығбал таптың,
Тәрепдары әдалаттың,
Ҳуқықымның қорғаўшысы.

Қыңыр иске қолды урмаң,
Жаманлыққа жүзди бурмаң,
Нызам менен болып қорған,
Ҳуқықымның қорғаўшысы.

Ел-журт ушын шаўып жүрген,
Әдил заңға қулақ түрген,
Ақ-қараны анық билген,
Ҳуқықымның қорғаўшысы.

Жети өлшеп көз-қарасын,
Айыплы алар жазасын.
Тәрезиде тасы басым,
Ҳуқықымның қорғаўшысы.

Байжан УЗАҚОВ,
28-ноябрь 2021-жыл,
Нөкис қаласы.

@bayjan_uzaqov Aç / Yorum Yap

2022-01-14 10:55:50 Шегерашыға.

Бауырына басып сууық қуралды,
Бир жигит турады қарап қырағы,
Бәримиз уйқыда тыныш жатқанда,
Шегерада ояу,сергек турады.

Тикенек сымлардың араларынан,
Нәзери алысқа қадалар мудам.
Көринер музлы қар жағаларынан,
Ел ушын тууылған хакыкый адам.

Сениң тилегиңди тилеп изиңде,
Қәуетер шекпекте Анаң хәм балаң.
Уатан аманлығы хәр бир сөзинде,
Сәждеге бас қояр ақ шашлы атаң.

Журтым топырағын былғамасын деп,
Бир жигит турады тәртиби қатаң.
Елим-халқым шуулап жыламасын деп,
Қырағы болмаққа шақырар Уатан.

Тынышлық дегениң теберик сезим,
Сол ушын жанын бермекке тайын.
Шегерашы қадап қырағы көзин,
Тик турар мысалы тербенбес қайың.

Жаныңа жаным шегерашым мениң,
Сен аман хәмийше елим де аман.
Қырағы болғыл ханаласым мениң,
Бизге жоламағай хеш қандай жаман.


2022-жыл. 14-январь.

Абат Крамов.

Каналымыз; @Kramov_Abat. Aç / Yorum Yap

2022-01-14 10:55:34 ЕЛИМНИН МӘРТ ЕРЕНЛЕРИ

Ўатанына садық болған,
қолға қарыў жарақ алған,
Тынышлықты етип уран
Елимниң мәрт жигитлери!

Ҳаял затын сыйлап билген,
Ана көрсе жанын берген,
Қызын үйде еркелеткен
Елимниң мәрт еренлери!

Бала шаға деп үйди ойлап,
Гезип кетер ҳәпте айлап,
Арасында тойын тойлап,
Елимниң мәрт жигитлери!

Қай исте де ҳеш қашпаған,
Жаўы келсе куўып салған,
Күни- түни арқаланған
Елимниң мәрт еренлери!

Намыс ушын жаўга бермей,
Қарындасын дауға бермей,
Гүзет етер кирпик илмей,
Елимниң мәрт әскерлери!

Қызды көрсе қыйпынлаған
Жүреклерин жаўлап алған,
Алдына көп талап қойган
Елимниң жас жигитлери!

Қосық жазар қызларға деп
Шықпас ҳеш жағына шеп
Гүл тутады жанына кеп
Каракалпак шайырлары!

Түрли жумыста аткарған,
Еки жолда көп катнаған,
Аўыр машина айдаған,
Қаракалпақ шоферлары.

Ақ халаты ийининде,
Тиймес ешким зейинине,
Берген көкирек пейилине,
Елим деген шыпакерлер.

Талап етер куни- туни,
Шыкпас еш уйде бир уни,
Излесенде жоқ қо мини,
Базы бир еркеклери.

Кирип шығып сөгинеди,
Қонақ келсе төгиледи,
Қәйын журтка көп күледи,
Сәл шәддеслеў еркеклери.

Жаслайынан шуғылланган,
Мойынлары тумарланған,
Өз байрағын қолға алған,
Өзбекстан палўанлары.

Кең сахрада Булбуллери,
Сайрағанға жүр Хүрлери,
Қаракалпақ гөззал жери,
Бар хош ҳаўаз жигитлери.

Тамақ асса қатырады,
Мыйлығынан батырады,
Изинде жок патыраты,
Қаракалпақ аспазлары.

Ҳәр үйдеги ер азаматларымыз аман болсын!
Бүгинги байрам мүбәрек ерлерге!

ДИЛБАРХАН АЙТЖАНОВА
Архивтен Aç / Yorum Yap